Fullkomin helgarpitsa

Ég hélt á dögunum pitsapartý fyrir fjölskyldu og vini og gerði þá þessar frábæru pitsur. Þar sem ég var með töluvert magn gerði ég deigið vel fram í tímann og lét í frysti. Tók þær svo út um morguninn og lét í þiðna í kæli og svo þurfti ég bara að skera niður grænmetið þegar að þessu kom og skella í pitsaofninn. Uppskriftin að þessum einfalda pitsabotni ásamt þessu óvenjulega en skemmtilega áleggi mun færa ykkur ansi nálægt hinni fullkomnu pitsu.  Í stað pitsasósu notaði ég ranch dressingu, setti kjúkling, gula papriku, vorlauk og mozzarella ost og bar hana fram með rucola. Hreint út sagt dásamleg og pínu sömmer…sem við elskum!

Fullkomin helgarpitsa
Deig fyrir 2 meðalstórar pitsur
1/2 bolli heitt vatn
2 1/4 tsk þurrger
4 bollar hveiti
1 1/2 tsk salt
1 1/4 bolli vatn við stofuhita
2 msk ólífuolía

Aðferð

1. Látið heita vatnið (1/2 bolli) í mælieiningakönnu (um 500ml). Stráið þurrgerinu yfir vatnið þannig að að liggi ofaná vatninu en hrærið ekki í blöndunni. Geymið.
2. Blandið hveiti og salti saman í hrærivélaskál.
3. Hellið vatninu við stofuhita saman við gerblönduna.
4. Stillið hrærivélina (með hrærunni, ekki hnoðara) á lægsta styrk og hellið gerblöndunni saman við hveitið og því næst olíunni. Hrærið þar til deigið byrjar að myndast. Takið þá hræruna af hrærivélinni og látið hnoðarann í staðinn. Hnoðið á lágum styrk í um 5 mínútur. Þá hefur myndast flott deigkúla.
5. Færið deigkúluna í olíusmurða skál og látið plastfilmu yfir skálina. Látið deigið tvöfaldast í stærð (um 1 1/2 tíma).
6. Hnoðið deigið niður með höndunum og skiptið í tvennt og mótið pitsakúlurnar. (Ef þið ætlið að frysta deigið að þá er nú tími til þess. Látið plast utanum kúlurnar og setjið strax í frysti).  Látið rakan klút yfir pitsakúlurnar og látið liggja í 10 mínútur.
7. Mótið pitsabotnana, penslið endana með olíu og látið álegg á.
8. Setjið pitsuna á pitsastein sem hefur verið í ofni í um 30 mín eða látið í pitsaofn og bakið þar til skorpan er gullin.

Ef þið frystið deigið: Takið deigið úr frysti um morguninn og látið þiðna í ísskápnum. Takið úr ísskápnum klukkutíma áður en þið bakið pitsuna.