Ítalskur sinnepskjúklingur með rótargrænmeti

Haustin er tími rótargrænmetis og þá streymir það í búðirnar nýtt og ferskt í öllum regnbogans litum. Það er gaman að elda úr rótargrænmeti og fjöldinn allur af uppskriftum í boði en að þessu sinni ætla ég að koma með skothelda uppskrift af ítölskum sinnepskjúklingi með rótargrænmeti. Rétturinn er ofureinfaldur í gerð, fljótlegur og alveg dásamlega bragðgóður. Það má leika sér með grænmetið og nota það hugurinn girnist eða það sem til er í ísskápnum hverju sinni.

Ofureinfaldur kjúklingaréttur
Kjúklingabringurnar skornar niður og penslaðar

Grænmetið skorið niður og dressingin sett saman við

..og eftir um 40 mínútur inní ofni er rétturinn tilbúinn

Dásamleg máltíð sem gerist vart einfaldari!

Ítalskur sinnepskjúklingur með rótargrænmeti
3 kjúklingabringur, ég notaði kjúklingabringur frá Rose poultry
60 ml ólífuolía
100 ml dijon sinnep
3 hvítlauksrif, söxuð
1 msk ítalskt krydd
1 stór laukur, skorinn gróflega
1 sæt kartafla, skorin gróflega
3 gulrætur, skornar gróflega
salt og pipar

Aðferð

1. Blandið saman í skál ólífuolíu, sinnepi og hvítlauknum. Hrærið vel saman.
2. Skerið bringurnar í þrennt og penslið þær með sinnepsdressingunni. Miðið við að nota í kringum 2-3 msk af dressingunni á bringurnar samtals.
3. Látið grænmetið í ofnfast mót og saltið og piprið. Hellið sinnepsdressingunni yfir grænmetið og blandið því vel saman. Hitið í ofni í um 20-30 mínútur eða þar til grænetið er farið að mýkjast.
4. Látið kjúklingabringurnar þá ofan á grænmetið og eldið í kringum 15 mínútur eða þar til kjúklingabringurnar eru gylltar og eldaðar í gegn.