Pizza bianca með heimagerðri hvítlauksolíu, klettasalati og parmaskinku

Home / Fljótlegt / Pizza bianca með heimagerðri hvítlauksolíu, klettasalati og parmaskinku

Gestabloggarinn að þessu sinni er hann Ragnar Freyr Ingvarsson sem heldur úti matarblogginu Læknirinn í eldhúsinu en hann var að gefa út sína fyrstu bók. Bókin heitir Læknirinn í eldhúsinu og inniheldur nýjar og freistandi uppskriftir. Alls 500 blaðsíður af nautn og rjóma. Kjöti og safa. Sósum og unaði. Kryddum og kitlandi sælu. Ostum, lundum, hvítlauk og hunangi. Grænmeti, ávöxtum og brakandi beikoni. – Bragð og lúxus. Smjör og súkkulaði. Vatn í munninn, já… eða dash af víni. Bókin var að mæta í verslanir í dag og fæst nú í öllum betri bókabúðum landsins. Ég bíð spennt eftir mínu eintaki.

laeknirinn_COVER_PRINT

Ég bað Ragnar um að gefa okkur hinum sýnishorn af því sem við megum meðal annars eiga von á. Hann tók vel í það og hér gefur hann okkur uppskrift af Pizza bianca með heimagerðri hvítlauksolíu, klettasalati og parmaskinku sem smellpassar inn í helgarmatseðilinn! Gef Ragnari orðið:

DSC_0119

Eins og flestir á mínum aldri þá höfum við verið svo gott sem alin upp á pizzum. Mamma eldaði gjarnan flatböku á föstudagskvöldum þegar ég var lítill. Hún hafði smakkað pizzu sjálf á fullorðinsaldri þegar hún starfaði sem flugfreyja fór út á pizzeríur þegar hún var í stoppi í New York. Hún tók þessa kunnáttu með sér heim og gladdi okkur heima með sínum eigin útgáfum. Bolognesesósan hennar endaði gjarnan sem pitsuálegg daginn eftir, okkur bræðrunum til mikillar ánægju. Það er merkilegt hvað flatbökur eru verðlaunandi og það er eiginlega erfitt að þykja nokkur flatbaka vond.

DSC_0100

Ég var 14 ára þegar Pizzahúsið fór að keyra heim flatbökur og við það stórmagnaðist flatbökuneyslan. Við vinirnir lögðum gjarnan í púk fyrir 18 tommu margarítu. Eldsmiðjan hafði þá verið til í nokkur ár en var bara keypt við sérsök tilefni – eldsmiðjupizzur voru auðvitað betri og því miður dýrari! Ég hef meira að segja starfað sem pizzasendill – en það var hjá Dominos, sem selja pizzur sem ég dag mér finnst ekkert merkilegar – alltof mikið brauð!

Svo þegar ég fór að búa sjálfur og áhuginn á matargerð jókst ennfrekar fór þetta að verða vikulegur viðburður. Síðan þá hef ég gert hundruðir ólíkra flatbaka. Sumar frábærar, sumar góðar og aðrar bara venjulegar – en alltaf getur maður borðað pizzu!

DSC_0131

Pizza bianca með heimagerðri hvítlauksolíu, klettasalati og parmaskinku
Ég fékk flatböku nýverið hjá vinum mínum og fannst hún alveg dásamlega góð. Hún er frábrugðin minni hefðbundnu uppskrift að því leyti að notað er gróft spelt og enginn sykur er notaður til þess að vekja gerið. Deigið er blandað og látið hefast í nokkra tíma. Munið að spelt þarf að hnoða vel. Síðan er deigið flatt út mjög þunnt og forbakað í eina til tvær mínútur.

Auðvelt er að kaupa parmaskinku út í búð – en fyrir þá sem vilja prófa að gera sína eigin, sjá hérna og svo er framhaldið sex mánuðum síðar, hérna!

DSC_0102

Fyrir speltpizzabotninn
Hráefnalisti
500 g gróft spelt
300 ml vatn
15 g ferskt pressuger
4 msk jómfrúarolía
4 tsk sjávarsalt

Aðferð

  1. Blandið saman öllum hráefnunum í hrærivél og hnoðið deigið 10-15 mínútur.
  2. Látið deigið hefast í tvær til þrjár klukkustundir.
  3. Fletjið það svo út mjög þunnt.
  4. Forbakið í eina til tvær mínútur í ofninum eða á grillinu.
  5. Raðið svo álegginu á botnana og bakið aftur í fjórar til fimm mínútur.

DSC_0096

Hvítlauksolían
3 dl jómfrúarolía
10 hvítlauksrif
1 tsk gróft salt

  1. Merjið hvítlaukinn smátt með saltinu í mortéli og setjið í krukku. Ef þið notið hvítlaukskvörn bætið þið saltinu við eftir á.
  2. Hellið svo olíunni yfir hvítlaukinn.
  3. Lokið krukkunni og hristið vel saman. Geymist lengi.

DSC_0131

Pizza Bianca
1 speltbotn – sjá ofan.
Handfylli mozzarellaostur
2 msk hvítlauksolía
5-6 sneiðar parmaskinka
2 handfyllir klettasalat
2 msk þurrsteiktar furuhnetur

Aðferð

  1. Penslið hvítlauksolíu á botninn og dreifið ostinum ofan á.
  2. Bakið í fjórar til fimm mínútur þangað til osturinn er bráðinn.
  3. Raðið síðan álegginu ofan, fyrst klettasalatinu og svo þunnt skorinni parmaskinku.

Berið fram með hvítvínsglasi.
mbk,
Ragnar

Leave a Reply

Your email address will not be published.

This site uses Akismet to reduce spam. Learn how your comment data is processed.