Ég hef ítrekað verið beðin um að setja inn uppskrift af mínum uppáhalds hummus og eftir nokkra mánaða aðlögunar- og umhugsunarfrest er ég loksins tilbúin að deila uppskrift af hummus sem er að mínu mati sá allra besti. Hér eru það sólþurrkuðu tómatarnir sem setja algjörlega punktinn yfir i-ið.
Með honum fylgir svo uppskrift af frábæru hrökkkexi sem er líka í miklu uppáhaldi en uppskriftin birtist upprunarlega í tímariti Sumarhúsið og garðurinn ásamt fleiri girnilegum uppskriftum frá GulurRauðurGrænn&salt. Hollt, gott og ofureinfalt = We like!
Hrökkkex
50 g haframjöl
50 g sesamfræ
50 g graskersfræ
50 g hörfræ
2 tsk lyftiduft
½ tsk sjávarsalt
100 g spelthveiti
100 g hveitiklíð
2 ½ dl vatn
¾ dl olía
- Setjið öll hráefnin saman í skál og blandið vel saman.
- Skiptið deiginu í tvo hluta og setjið á bökunarplötur með smjörpappír leggið smjörpappír yfir deigið og rúllið með kökukefli yfir þannig að það dreifist vel úr því.
- Notið pizzahníf til að skipta deiginu niður í bita, stærð að eigin vali. Setjið í 180°c heitan ofn í um 15-20 mínútur.
Hummus með sólþurrkuðum tómötum
450 g kjúklingabaunir, soðnar
2-3 hvítlauksrif, pressuð
1 ½ tsk sjávarsalt
5 msk safi úr ferskri sítrónu
60 ml vatn
55 g tahini
60 ml ólífuolía
3-4 msk sólþurrkaðir tómatar (sólþurrkaðir tómatar)
- Setjið kjúklingabaunir, hvítlauk og sjávarsalt í matvinnsluvél, stillið vélina á pulse og vinnið í um 30 sekúndur. Bætið sítrónusafa og vatni saman við og vinnið í aðrar 30 sekúndur.
- Bætið tahini og blandið saman. Hellið síðan ólífuolíu varlega saman við meðan vélin er í gangi. Að lokum setjið þið sólþurrkuðu tómatana út í og blandið vel saman.
Leave a Reply