Ómótstæðilegir ostakökubitar sem gaman er að bjóða upp á í veislum og hentar sérstaklega vel með pinnamat, nú eða í eftirrétt með góðum kaffibolla. Þessir slá alltaf í gegn.
Oreo ostakökubitar
Gerir um 40 stk.
36 oreokex
4 msk smjör
900 g rjómaostur, mjúkur
200 g sykur
230 g sýrður rjómi
1 tsk vanilludropar
4 egg
Til skreytingar
Dökkt súkkulaði
Hvítt súkkulaði
- Myljið 24 oreokexkökur (ath. ekki allar) vel niður t.d. í matvinnsluvél. Bræðið smjör og blandið þessu tvennu síðan vel saman. Látið kexblönduna í 23×33 cm smurt form og þrýstið vel niður.
- Hrærið saman rjómaost og sykur þar til það hefur blandast vel saman. Bætið sýrðum rjóma og vanillu saman við og hrærið vel. Bætið því næst eggjum, einu í einu. Hrærið þar til eggin hafa rétt blandast við deigið. Brjótið afganginn af kexkökunum gróflega niður og bætið varlega saman við deigið með sleif. Hellið síðan yfir kexbotninn og látið inn í 160°c heitan ofn í um 40 mínútur. Takið þá kökuna úr ofninum og leyfið henni að kólna alveg.
- Hyljið síðan með filmu eða álpappír og geymið í ísskáp í amk. 2 tíma. Skerið að lokum kökuna í litla munnbita, bræðið súkkulaðið og sprautið yfir. Setjið kökurnar á fallegan disk og skreytið með jarðaberjum.
Leave a Reply