Karmelluostakaka með oreobotniPrenta

Mikið sem það var nú notalegt að vakna upp í morgun og sjá fallega snjóbreiðu yfir öllu. Á svona dögum er dásamlegt að búa á Íslandi.
Ég skellti mér í góðan göngutúr í þessu hressandi veðri og kom svo inn og gæddi mér á dásamlegu tei úr nýju tebollunum mínum sem ég fékk hjá Tefélaginu. Bollarnir kallast lófamál og hér erum við að tala um ást við fyrstu sín.

2014-01-07 13.16.34

2014-01-07 13.19.11

Lófamál

En frá því að ég vaknaði hef ég ekki hugsað um annað en hversu mikið mig langar í köku. Fór að skoða gamlar kökufærslur af síðunni og velti þvi fyrir mér hvað ég gæti gert sniðugt í dag og fattaði þá að ég hafði ekki enn birt uppskriftina af himnesku Karmelluostakökunni með oreobotninum á GulurRauðurGrænn&salt. Uppskriftin birtist í Nudemagazine og sló þar heldur betur í gegn enda algjört gúmmelaði sem ég mæli svo innilega með því að þið prufið.

karmellukaka

Karmelluostakaka með oreobotni
Botn
20 oreo kexkökur, krem fjarlægt
5 msk smjör, brætt
2 msk sykur

Ostakakan
900 g rjómaostur, við stofuhita
220 g púðusykur
2 msk smjör, brætt
5 egg
2 tsk vanilludropar

Karmellusósa
300 g sykur
60 ml vatn
1 tsk sítrónusafi
240 ml rjómi


Botn aðferð

  1. Myljið oreokökurnar smátt niður. Blandið kökum, smjöri og sykri vel saman. Látið blönduna í olíusmurt form. Setjið álpappír yfir formið og bakið í 175°c heitum ofni í 15 mínútur. Kælið.

 

Ostakakan aðferð

  1. Hrærið rjómaosti og sykri saman í hrærivél á miklum hraða þar til blandan er orðin létt og ljós.  Bætið þvi næst smjöri saman við og síðan eggjum, einu í einu. Hrærið að lokum vanilludropunum út í. Hellið því næst blöndunni yfir botninn.
  2. Bakið i ofni við 175°c hita í um 1 klukkustund og 15 mínútur. Kæli vel áður en hún er borin fram.

 

Karmellukrem aðferð

  1. Látið sykur, vatn og sítrónusafa á pönnu við meðalhita þar til sykurinn hefur bráðnað. Látið þá blönduna sjóða án þess að hræra í henni þar til blandan fer að dökkna lítillega. Lækkið þá hitann og látið malla í um 8 mínútur. Bæti þá rjómanum varlega saman við og látið malla við meðalhita í nokkrar mínútur eða þar til karmellan hefur þykknað.Kælið lítillega og hellið síðan yfir ostakökuna.

Leave a Reply

Your email address will not be published. Required fields are marked *