Helgarmaturinn er nú frekar ljúffengur að þessu sinni en það er dásemdar risotto með smjörsteiktum aspas. Í minningunni er risotto frekar tímafrekur og flókinn réttur, en það á ekki við neina stoð að styðjast hér. Uppskriftin er fljótleg og frábær og mun svo sannarlega slá í gegn hjá öllum sem hana gera. Hér er komin frábær afsökun til að hóa í góða saman gott fólk.
Með þessum rétti bar ég fram nýja uppáhalds hvítvínið mitt sem heitir Domaine Malandes Petit Chablis – hvorki meira né minna. Litlar Chablis-flöskur (petit þýðir lítill) geta verið algjört happadrætti. Á góðum árum frá góðum framleiðendum geta þær verið afar ljúffengar sem á svo sannarlega við í þessu tilfelli en hér er á ferðinni frábært hvítvín. Í munni er það þurrt með góða sýru og hentar vel með allskonar fiskmeti, humri, ljósu kjöti, forréttum nú eða bara eitt og sér. Fæst í verslunum ATVR á frábæru verði. Njótið vel kæru vinir.
Uppskrift að góðu kvöldi
Unaðslegt risotto með smjörsteikum aspas
1 laukur, smátt saxaður
2-3 hvítlauksrif, söxuð
1 búnt aspas, ferskur
1 tsk grænt pestó
150 g arbori (risotto hrísgrjón)
1 l grænmetissoð
1 fullt hvítvínsglas
handfylli rifinn parmesanostur
1 msk smjör
salt og pipar
steinselja
- Setjið smjör eða olíu í pott og steikið lauk og hvítlauk. Hellið því næst hrísgrjónum saman við og því næst hvítvíni. Saltið lítillega.
- Lækkið hitann og hellið smá af grænmetissoðinu saman við og hrærið reglulega í blöndunni. Þegar hrísgrjónin hafa tekið í sig allt soðið hellið meira soði og endurtakið þar til allt soðið er búið. Í heildina ætti risottoið að sjóða í um 20 mínútur.
- Setjið smjör á pönnu og léttsteikið aspasinn og skerið síðan í bita. Þegar hrísgrjónin eru búin að sjóða í um 13 mínútur bætið þá aspasinum saman við hrísgrjónin og sjóða með hrísgrjónunum síðustu mínúturnar.
- Þegar hrísgrjónin eru að fara að verða fullsoðin bætið parmesan ostinum saman við.
- Bætið að lokum smjöri og pestó saman við og smakkið til með salti og pipar.
- Stráið parmesan og steinselju yfir allt og njótið vel.
Leave a Reply