Maður fær aldrei nóg af mexíkóskum mat og hér er uppskrift sem ætti að vekja mikla lukku. Hráefnin eru fá og matreiðslan einföld en lykillinn liggur í dásamlegri kryddblöndu sem setur svo sannarlega punktinn yfir i-ið. Þetta fajitast má bera fram sem aðalréttur með góðu salati og hrísgrjónum eða sem fylling í dásemdar tortillur. Ykkar er valið…og þetta verður alltaf frábært.
Mexíkóskt fajitas á ofureinfaldan hátt
4 kjúklingabringur, t.d. Rose Poultry kjúklingabringur eða læri
4 paprikur, í sem flestum litum
1/2 laukur
2 msk olía, ég notaði kaldpressaða ólífuolíu frá Rapunzel
2 tsk taco krydd
1 tsk chilí krydd
1 tsk cumin (ekki kúmen)
1 tsk hvítlauksduft (garlic powder)
safi úr 1/2 – 1 límónu
ferskt kóríander, saxað
- Skerið kjúklinginn í litla bita og paprikurnar og laukinn í sneiðar.
- Blandið kjúklingi, paprikum og lauk saman í stóra skál og hellið ólífuolíunni yfir. Blandið öllum kryddunum saman og stráið yfir allt. Blandið vel saman.
- Setjið smjörpappír á ofnplötu og hellið þessu yfir á hana. Dreyfið vel úr.
- Eldið í 180°c heitum ofni í um 15-20 mínútur eða þar til kjúklingurinn er fulleldaður og grænmetið farið að mýkjast.
- Kreystið límónusafa yfir allt, byrjið á safa úr 1/2 límónu og bætið meira safa saman við ef ykkur finnst þörf á því.
- Stráið söxuðu kóríander yfir allt. Berið fram með hrísgrjónum og góðu brauði eða sem fyllingu í tortillu.
- Umfram allt…njótið vel.
Leave a Reply