Kjúklingasalat með kasjúhnetum, beikoni og geggjaðri balsamikdressingu

Á mínum yngri árum var hægt að ganga að því sem vísu að ef kjúklingasalat var á matseðli á veitingarstað þá var ég búin að ákveða hvað yrði pantað í það skipti. Flóknara var lífið ekki – ahhh sælla minninga. Í seinni tíð hefur úrvalið aðeins aukist en þó er ávallt jafn ánægjulegt að gæða sér á litríku og stökku kjúklingasalati á veitingastað með mögulega eins og einu hvítvínsglasi.

Það er mjög einfalt að útbúa gott kjúklingasalat og í raun bara spurning um góð hráefni og örlitla natni. Því furða ég mig oft á því þegar veitingastaðir ná að klúðra þessum einfalda rétti með að því er virðist miklu metnaðarleysi og ákveðin vonbrigði þegar kál, tómatar í bátum og nokkrar gúrkusneiðar koma ásamt 3 fetaostabitum og leitin að kjúklinginum er eins og leitin að nálinni í heystakknum (þó ég hafi nú reyndar aldrei leitað að henni þar). Segið mér að þið séuð að tengja!

Þetta kjúklingasalat er ofarlega á lista yfir það allra besta og líklega er það með aðstoð balsamikdressingunnar sem slær allar aðrar dressingar út af borðinu. Í salatið getið þið látið það grænmeti sem  ykkur hugnast og eigið til í ísskápnum hverju sinni og því frábær réttur til að sporna gegn matarsóun. Þetta salat er algjör B.O.B.A.

Maturinn skreytir sig sjálfur með þessum fallegu litum

Dressingin setur punktinn yfir i-ið