Piparostabrauð

Þetta brauð þarf ekkert að útskýra. Það er bara dásamlega himneskt, einfalt í gerð, passar með öllu – hvort sem er með mat eða bara á brunch borðið.

Fá hráefni og ekkert vesen. Leiðbeiningarnar kunna að líta út fyrir að vera flóknar en það er nú alls ekki allt sem sýnist!

Piparosturinn er bæði settur í brauðið og ofan á og hann gefur alveg einstaklega gott bragð.

Að þessu sinni set ég inn nokkrar myndir af ferlinu og þá sjáið þið vel hversu vel deigið lyftir sér og hversu flöffí og mjúkar bollurnar verða.

Njótið vel!

	9 dl brauðhveiti, ég notaði bláa Kornax, finnst það koma best út
	1 poki þurrger
	2 tsk himalayasalt, aðeins minna ef notað er borðsalt
	4 dl mjólk
	2 msk olía
	1 piparostur frá Örnu - rifinn og skipt í tvennt
	Mozzarellaostur með pipar frá Örnu
	1 egg
	Fersk steinselja ef vill

1.	Velgið mjólkina upp í 37°
2.	Blandið gerinu saman við og hrærið aðeins í, látið bíða í 5 mín.
3.	Setjið þurrefni, ásamt helmingnum af piparostinum og 80gr af mozzarellaosti í hrærivélaskál
4.	Bætið ger/mjólkurblöndu saman við og hnoðið með hnoðaranum. Bætið olíu saman við stuttu á eftir.
5.	Hnoðið í hrærivélina í góðar 5 mín.
6.	Smyrjið miðlungsstóra skál með olíu og setjið deigið í, breiðið plastfilmu yfir og látið hefast í 1 klst.
7.	Búið til litlar bollur úr deiginu og raðið á bökunarpappír sem hefur verið settur á ofnplötu.
8.	Sláið saman egginu og penslið bollurnar og stráið restinni af ostinum yfir, bæði rifna piparostinum og mozzarellaostinum.
9.	Hefið í ofni sem stilltur er á 50° í 30 mín.
10.	Takið brauðið út og hitið ofninn í 200°C. Bakið í ca. 15 mín eða þar til bollurnar og osturinn er orðinn vel gylltur.